Назорати ҳолати иҷрои қонунгузории замин дар ВМКБ

Хоруғ, 23 июл. (АМИТ «Ховар», Л.Додо ). – Дар прокуратураи ВМКБ барои хабарнигорони бурунмарзию дохилӣ бо иштироки прокурори вилоят ва роҳбарони сохторҳои қудратӣ нишасти матбуотӣ баргузор шуд. Зикр шуд, ки дар вилоят ҳолати иҷрои қонунгузории замин ҳамчун самти афзалиятнок таҳти назорати доимӣ қарор дорад. Дар ин самт 35 санҷиш гузаронида шуда, 28 қарори раисони шаҳру навоҳӣ дар боби ҷудо кардани қитъаҳои замин бекор шуда, 62 нафар ба ҷавобгарии маъмуриву интизомӣ кашида шудаанд. Ба хотири содир намудани ҷиноятҳои сӯиистифода аз мансаб ва сохтакории ҳуҷҷатҳо ҳангоми ҷудо намудани қитъаҳои замин иҷрокунандаи вазифаи раиси кумитаи заминсозии ноҳияи Ишкошим Б.Меликбеков, мудири шӯъбаи иқтисод ва савдои мақомоти маҳаллии ҳокимияти давлати ноҳия Р.Раҳимбеков ба ҷавобгарии ҷиноӣ кашида шудаанд.