«Пайванд» китоби нави сафирро чоп кард
Душанбе, 4 июл.(АМИТ «Ховар», Марзия Саидова).-«Шеъри муосири Эрон» -чунин ном гирифтааст китоби тозанашри сафири Ҷумҳурии Исломии Эрон дар Ҷумҳурии Тоҷикистон Алиасғари Шеърдўст. Китоби мазкур аз сўи Пажўҳишгоҳи фарҳанги форсӣ-тоҷикии Сафорати Эрон дар Душанбе дар нашриёти «Пайванд» бо ҳуруфоти кириллӣ чоп шудааст. Дар китоб маълумоти мукаммал доир ба рўзгор ва осори 60 шоири муосири эронӣ гирд оварда шудаанд. Ҳамзамон, муаллифи китоб доир ба мақоми шеъру адаби форсӣ, хусусан ҳаёти адабии даврони Коҷориҳо, Паҳлавиён таҳти унвони «Нигоҳе ба давлати Коҷор», «Заминаҳои инқилоби машрутият», «Асри Паҳлавӣ», «Нимнигоҳе ба шеъру шоирони машрута», «Нигоҳе ба адабиёти асри Ризошоҳ», «Нигоҳе ба авзои адабии асри Муҳаммадризои Паҳлавӣ» матолиби ҷолиби таърихию адабиро ҷамъ оварда, пешкаши хонандагон намудааст. Дўстдорони шеъру адаби форсӣ имкон доранд аз ин китоб доир ба рўзгор ва осори шоирони эронӣ ба мисли Маликушшуаро Баҳор, Мирзода Ишқӣ, Фаррухии Яздӣ, Парвини Эътисомӣ, Нимо Юшиҷ, Аҳмади Шомлу, Фурўғи Фаррухзод, Сўҳроби Сипеҳрӣ, Нодири Нодирпур, Сиёвуши Касроӣ, Шаҳриёр, Симини Беҳбаҳонӣ ва соири шоирони муосири ин кишвар маълумоти кофӣ ба даст оранд. Алиасғари Шеърдўст дар радифи китоби «Шеъри муосири Эрон» боз муаллифи китобҳои «Чашмаи хуршед», «Ёдгори рўзгор», «Чашмандози шеъри муосири Тоҷикистон», «Омўзиши забони форсӣ дар Ҷумҳурии Озарбойҷон», «Маҷлиснишини қудс», «Бўйи ҷон», «Нақши айём» мебошад. Маҳз бо дастгирии ў дар Тоҷикистону Эрон беш аз 200 китобу асарҳои шоирону нависандагон ва донишмандони тоҷик нашр гардидаанд. Хизматҳои Шеърдўстро дар бахши рушди фарҳанг ва шеъру адаб Ҳукумати Тоҷикистон қадр намуда, ўро ба унвони ифтихории корманди шоистаи Тоҷикистон мушарраф намудааст. Инчунин дар соли 2010 мавсуф ба унвони узви хориҷии Академияи илмҳои Ҷумҳурии Тоҷикистон пазируфта шуд.








Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Имрӯз дар Тоҷикистон ҳавои тағйирёбандаи бебориш пешгӯӣ мешавад
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Дар шаҳри Панҷакент фаъолияти корхонаҳои саноатӣ тақвият меёбад
Дар Тоҷикистон масоҳати хонаҳои истиқоматӣ бештар гардидааст
Дар шаҳри Кӯлоб бахшида ба Рӯзи Президенти Тоҷикистон ҳамоиш доир шуд
Мардуми ноҳияи Рашт дар симои Пешвои миллат наҷотбахши миллату давлат, кафили сулҳу ваҳдат ва эҳёгари фарҳанги миллиро мебинанд






