Сохтмони мактабҳо аз ҳисоби қарзи Фонди Саудии Рушд

Душанбе, 25 июл.(АМИТ «Ховар», Марзия Саидова).-12 иншоот барои 1796 ҷойи нишаст дар соли равон аз ҳисоби маблағҳои мутаммаркази асосии ба Вазорати маорифи кишвар пешбинигардида сохта мешаванд. Инчунин аз ҳисоби маблағҳои марҳилаи сеюми гранти Фонди каталитикӣ таъмиру барқарорсозии 30 иншоот дар бахши маориф дар назар аст.  Ҳамзамон, корҳои таъмиру барқаросозии Маркази такмили ихтисоси кормандони соҳаи маорифи шаҳрҳои Кўлобу Қўрғонтеппа, Хуҷанд ва Душанбе, мактаб-интернати ҷумҳуриявии кўдакони ношунаво /ноҳияи Рўдакӣ/, мактаб-интернати ҷумҳуриявӣ барои кўдакони нобино /ноҳияи Ҳисор/ ва мактаб-интернати ҷумҳуриявии низомаш махсус воқеъ дар ноҳияи Ҳисор идома дорад. Инчунин дар доираи амалисозии марҳилаи дуюми лоиҳаи «Ба анҷомрасонии сохтмони панҷ мактаби миёна ва дастрас намудани таҷҳизотҳо», ки аз ҳисоби қарзи Фонди Саудии Рушд ва саҳми Ҳукумати Ҷумҳурии Тоҷикистон маблағгузорӣ карда мешавад, алҳол шартномаҳои пудратӣ барои оғози сохтмони се иншоот ба маблағи беш аз 6 миллион доллари амрикоӣ баста шудааст.