Таркиш дар Душанбе

Душанбе, 5 июл. (АМИТ «Ховар», Лутфия Эшонкулова).-Субҳи имрӯз дар бинои ҶДММ «Омега», воқеъ дар кӯчаи Карамови ноҳияи И.Сомонӣ таркиш ба амал омад. Ба иттилои сомонаи расмии ВКД ҶТ, ҳарчанд таркиш боиси ташвишу изтироби сокинони ин маҳалла гардид, вале дар натиҷаи он танҳо оинаҳои ҳуҷраи посбонӣ шикаста, ба касе зарари ҷисмонӣ нарасидааст. Дар рафти тафтиш маълум шуд, ки бар асари риоя накардани қоидаҳои бехатарӣ ва хунукназарона муносибат кардан бо таҷҳизоти барқӣ дастгоҳи обгармкунии худсоз бе об монда, сабаби рух додани таркиш гардидааст. Аз шаҳрвандон хоҳиш карда мешавад, ки ҳангоми истифодаи дастгоҳҳои барқию газӣ риояи қоидаҳои бехатарӣ ва муносибати дуруст бо онҳоро фаромӯш накунанд.