Ҷаҳонисозии геология тавассути дастовардҳои илмӣ

Душанбе, 27 август. (АМИТ «Ховар», Фирӯза Давлатова). -Дар шаҳри Брисбени Австралия Конгресси байналмилалии геологҳо (КБГ) доир гардид, ки дар он 5000 намоянда аз 112 кишвари дунё иштирок намуд. Геологони тоҷик дар ин иҷлосия бори дуюм аст, ки ширкат меварзанд. Бино ба иттилои сардори саридораи геологияи назди Ҳукумати Ҷумҳурии Тоҷикистон Азим Иброҳим дар ҷаласаи 34-ум намояндагони тоҷик се маърӯза карданд. А. Иброҳим афзуд, ки иштироки намояндагони геологҳои Тоҷикистон бо сарпарастии ширкатҳои Финляндия, Ҷумҳурии Мардумии Чин ва Австралия имконпазир гардид.Мавриди зикр аст, ки мақсади асосии иҷлосияи КБГ «Australia-2012»-татбиқи кашфиёти навини соҳаи геология, дастовардҳои фановарӣ ва такмилу равнақи илмҳои заминшиносӣ буд, ки дар КБГ таҳти шиори «Дастовардҳои илмӣ ва ҷаҳонисозии геология» баррасӣ гардид.Дар доираи барномаи иҷлосияи 34-уми КБГ ҳамчунин чорабиниҳои иҷтимоӣ ва экскурсияҳои геологӣ ба иншооти шавқовар, намоишномаҳо, аз ҷумла намоишҳои «GeoExpo» гузаронида шуданд.Тибқи қарори қабулшуда иҷлосияи навбатии 35-уми КБГ соли 2016 дар шаҳри Йоханесбурги Ҷумҳурии Африқои Ҷанубӣ, иҷлосияи минбаъдаи 36-уми КБГ соли 2020 дар Ҳиндустон баргузор хоҳад гашт.