Ҷараёни амалиёти «Бачаҳо» дар Бадахшон

Бадахшон, 31 август. (АМИТ «Ховар», Л. Додо).- 25-уми август дар қаламрави ВМКБ амалиёти мақсадноки «Бачаҳо» оғоз гардид. Шӯъбаи Бозрасии давлатии автомобилии РВКД ВМКБ баҳри дар сатҳи баланд гузаронидани он тадбирҳои зиёдро амалӣ мегардонад. Бозраси калони ШБДА РВКД ВМКБ, капитани милитсия Фотима Азизбекова гуфт, ки мақсади асосии чорабинӣ гирифтани пеши ҳодисаҳои нохуши нақлиётие мебошад, ки боиси ҳалоку маҷрӯҳ шудани ноболиғон ва кӯдакон мегарданд. Шӯъбаи Бозрасии давлатии автомобилӣ барои ронандагону волидайну омӯзгорон муроҷиатнома қабул намуд, ки дар он ронандагон ба риояи бехатарии ҳаракати роҳ даъват мешаванд. Омӯзгорон бояд дар ёд додани қоидаҳои ҳаракати роҳ ба шогирдони хеш, хусусан ба хонандагони синфҳои ибтидоӣ диққати зарурӣ диҳанд.