18 медали варзишгарони тоҷик дар мусобиқоти ҷаҳон

Душанбе, 28 август. (АМИТ «Ховар», Пайрав Назаров). – Аз 23 то 26 август дар шахри Таллини Эстония мусобиқоти ҷаҳон аз рӯи таэквон-до байни ҷавонон ва собиқадорон баргузор гардид, ки дар он беш аз 800 нафар варзишгарони 60 кишвари ҷаҳон иштирок доштанд. Тавре ки дар Федератсияи таэквон-дои Тоҷикистон ба АМИТ «Ховар» хабар доданд, дастаи кишвари мо дар ин мусобиқот 5 медали тилло, 5 медали нуқра ва 8 медали биринҷӣ ба даст оварда, байни дастаҳои ҷавонон ҷойи сеюмро ишғол намуд. Ҳамчунин пеш аз мусобиқот конгресси Федератсияи байналмилалии таэквон-до баргузор гардида, дар он ҷараёни мусобиқоти Осиё оид ба ин намуди варзиш, ки аз 25 то 29 апрел дар шаҳри Душанбе сурат гирифта буд, ба дараҷаи баланд арзёбӣ гардид.