30 млн. зарари тасарруфи молу мулк баргардонида шуд

Душанбе, 7 август. (АМИТ «Ховар», Лаззат Диловарзод).- Фаъолияти судҳои шаҳру навоҳии Ҷумҳурии Тоҷикистон сол аз сол беҳтар мегардад, онҳо фаъолияти худро дар доираи татбиқи кафолатҳои конститутсионии ҳифзи ҳуқуқ ва озодиҳои шаҳрвандон, манфиати давлат, ташкилоту муассисаҳо, қонунияту адолат ба роҳ мондаанд,- иброз дошт раиси Шӯрои адлияи ҷумҳурӣ Зафар Азизов ба мухбири АМИТ «Ховар». Дар нимсолаи аввали соли ҷорӣ аз ҷониби судҳои марҳилаи якум, апеллятсионӣ, кассатсионӣ ва назоратӣ 57 ҳазору 588 адад парвандаи ҷиноӣ, гражданӣ, оилавӣ, маъмурӣ, иқтисодӣ ҳамчунин дархостҳои мақомоти тафтишоти пешакӣ ва пешниҳодҳои муассисаҳои ислоҳӣ баррасӣ гардид. Дар ин давра судҳо аз рӯи маблағҳои боҷи давлатӣ, ҷарима, мусодираи молу мулк (аз тариқи маблағҳои пулӣ), товони зарари аз тасарруфи молу мулки давлатӣ ва дигар ҷиноятҳо, инчунин дар асоси даъвоҳои прокурорҳо нисбат ба ҷиноятҳои иқтисодие, ки аз ҷониби ашхоси ҳуқуқӣ ва инфиродӣ содир шудаанд, ба андозаи 30 млн.168 ҳазору 206 сомонӣ ва 82 ҳазору 800 доллари амрикоӣ ба фоидаи давлат рӯёниданд ва ин нисбат ба соли 2011 қариб сад маротиба зиёд аст.