Бахтиёри “Субҳи ҷавонии ман” аз олам даргузашт

Душанбе, 9 август. (АМИТ «Ховар», Мавҷуда Анварӣ). — Шамс Ҳайдаров, ҳунарманди тоҷик дирӯз, 8 августи соли ҷорӣ дар синни 58- солагӣ, ки тӯли чанд соли охир аз бемории гурда ранҷ мекашид, дар шаҳри Маскав оламро падруд гуфт. Ин ҳунарманди тоҷик баъд аз солҳои 2000 ба пойтахти Русия рафта, то охирин лаҳзаҳои умраш дар ин шаҳр зиндагӣ мекард.Ш. Ҳайдаров дар тӯли фаъолияташ дар чандин филмҳои ҳунарӣ нақш бозидааст. Вай аз ҷумла нақши Бахтиёрро дар филми “Субҳи ҷавонии ман” соли 1979, нақши Самадро дар филми “Имрӯз ва ҳамеша” соли 1982 ва нақши Саидро дар филми “Нигоҳи шод” дар сатҳи олӣ иҷро намуда, миёни мардум шӯҳрати зиёдро касб карда буд. Ҳамчунин марҳум тайи чанд сол вазифаи муовини раиси Кумитаи телевизион ва радиои назди Ҳукумати Ҷумҳурии Тоҷикистонро бар ӯҳда дошт.