Барқияи шодбошии Э. Раҳмон ба Президенти Ҳиндустон

Душанбе, 16 август. (АМИТ «Ховар»).-Президенти Ҷумҳурии Тоҷикистон Эмомалӣ Раҳмон ба Президенти Ҷумҳурии Ҳиндустон Пранаб Мукерҷӣ барқияи шодбошӣ ирсол намуд, ки дар он омадааст:Ҷаноби Олӣ,Сарфарозам, ки Шумо ва мардуми дӯсти Ҳиндустонро ба муносибати ҷашни солгарди истиқлоли кишвар табрику таҳният гӯям.Мамлакатҳои мо тӯли чандин садсолаҳо робитаҳои гуногунҷанбаи таърихӣ доштанд. Ин таҷрибаи муфиду бузург тақозо менамояд, ки дар шароити имрӯза низ мо ҳамкориҳои судманди гуногунарсаро рушду густариш бахшида, сатҳи онро ба зинаҳои баландтар бардорем.Дастовардҳои назарраси кишвари фарҳангпарвари Ҳинд дар самтҳои гуногун ва боло рафтани нуфузи байналмилалии он боиси хурсандии мост.Ҷумҳурии Тоҷикистон, мисли пешина, мӯътақид бар он аст, ки ҳамкории васеъ ва мутақобилан судманди бунёдии ду кишвари дӯст на фақат ҷавобгӯи манфиатҳои миллии онон, балки омили муҳими суботу истиқрор ва пешрафти минтақа мебошад. Итминон дорам, ки дар оянда низ ба хотири пешрафти ин раванди созанда ҳар ду ҷониб саъю эҳтимом ва кӯшишҳои пайвастаи хешро дареғ нахоҳанд дошт.Бо ибрози таманниёти беҳтарини пешрафту шукуфоӣ ба мардуми дӯсти Ҳиндустон, ба Шумо, Ҷаноби Олӣ, сиҳатии комил, хушрӯзӣ ва дастовардҳои навин хоҳонам.Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.