Барқияи табрикотии Эмомалӣ Раҳмон ба Виктор Янукович

Душанбе, 24 август. (АМИТ «Ховар»).-Президенти Ҷумҳурии Тоҷикистон Эмомалӣ Раҳмон ба Президенти Украина Виктор Янукович барқияи табрикотӣ ирсол намуд, ки дар он чунин омадааст:Мӯҳтарам Виктор Фёдорович, Ба муносибати солгарди иди миллии Украина — Рӯзи истиқлолият табрикоти самимонаамро бо қаноатмандии зиёд ба Шумо ва ҳамаи халқи Украина ирсол медорам.Тоҷикистон ба рушди устувори ҳамкории ҳамаҷонибаи Тоҷикистону Украина аҳамияти бузург дода, ҷонибдори минбаъд ба он бахшидани мазмуни мушаххас аст.Мо аминем, ки ҳамкориамонро, ки дар анъанаҳои мустаҳками дустӣ ва ҳамкории мутақобилан муфид қарор дорад, бо саъю кӯшишҳои муштарак таҳким мебахшем. Бовар дорам, ки муносибатҳои байни ҳарду халқу давлатҳоямон ба принсипҳои баробарҳуқуқӣ ва назардошти манофеи ҷонибайн такя карда, пайгирона рушду густариш ёфта ва бахшҳои нав ба навро фаро мегиранд.Иҷозат фармоед ба Шумо, мӯҳтарам Виктор Фёдорович, тансиҳатии бардавом ва комрониҳо ва ба халқи бародари Украина беҳбудӣ ва шукуфоии минбаъдаро орзу намоям.Аз Хадамоти матбуоти Президенти Ҷумҳурии Тоҷикистон дар ин бора ба АМИТ «Ховар» хабар доданд.