Баррасии ҳолати кунунии бахши алоқаи Тоҷикистон

Душанбе, 28 август. (АМИТ «Ховар», Дилшодаи Хайруллоҳ). — Имрӯз Сарвазири Ҷумҳурии Тоҷикистон Оқил Оқилов Президенти ширкати «ТелиаСонера» Ларс Нюбергро ба ҳузур пазируфт. Дар вохӯрӣ ҳолати кунунӣ ва дурнамои ҳамкориҳои сохторҳои бахши алоқаи Тоҷикистон бо ширкати «ТелиаСонера», ки дар бозори ҷаҳонии алоқа ва интернет мавқеи хоссаи худро дорад, баррасӣ шуд. Тавре ки таъкид шуд, ширкати «ТелиаСонера» дар Ҷумҳурии Тоҷикистон дар соҳаи алоқа ва хизматрасонии интернетӣ фаъолияти густурда дошта, аз муассисони асосии ширкати мобилии «Тсел» ба ҳисоб меравад. Дар мулоқот доир ба фароҳам овардани шароити зарурии алоқаи мобилӣ ва интернет дар Ҷумҳурии Тоҷикистон табодули афкор сурат гирифта, ба зарурати омода намудани мутахассисони ин соҳа аз ҷониби ширкати «ТелиаСонера» ва дигар ширкатҳои мобилии Тоҷикистон махсус таъкид шуд.