Беҳдошти сатҳи зиндагӣ дар Хатлон

Душанбе, 16 август. (АМИТ «Ховар», Лаззат Диловарзод).- Кормандони Пажӯҳишгоҳи боғпарварию сабзавоткории ҷумҳурӣ дар ҳамкорӣ бо ташкилоти «Бунёди байналмилалии рушди кишоварзӣ» дар татбиқи лоиҳаи «Беҳсозии сатҳи зиндагӣ дар вилояти Хатлон» корҳои зиёдеро ба сомон расониданд. Аз ҷумла, лоиҳаи «Санҷиши технология ва намоишдиҳии он дар хоҷагиҳои деҳқонӣ»-и ҷамоати деҳоти Даштиҷум ва Ёли ноҳияи Шӯрообод, қитъаҳои намоишдиҳии парвариши зироатҳои сабзавотию полезӣ ва навниҳолони дарахтони мевадиҳандаро дар ҷамоати Шоҳину Кӯлчашмаи ноҳияи Мӯъминобод ташкил доданд, ки дигар хоҷагидорон аз он чун Маркази таҷрибавии омӯзиш ва парвариши сабзавоту меваҳо, истифода мебаранд,- иброз намуд президенти Академияи кишоварзии ҶТ Ҳикматулло Аҳмадов ба мухбири АМИТ «Ховар».Ба гуфти академик Ҳ. Аҳмадов, доир ба иҷрои дигар лоиҳаи рушди соҳаи тухмипарварӣ дар минтақаи Осиёи Марказӣ ва Қафқоз дар ноҳияи Ҷиргатол парвариши тухмии картошка бо усулҳои босамар ба роҳ монда шуд, ки танҳо баъди ҷамъоварии ҳосил ба он баҳои илмии асоснок дода мешавад.