Боздиди Эмомалӣ Раҳмон аз «Баракати шири Ёвон»

Душанбе, 4 август. (АМИТ «Ховар», Дилшодаи Хайруллоҳ).- Президенти Ҷумҳури Тоҷикистон Эмомалӣ Раҳмон зимни сафари кории худ ба ноҳияи Ёвон аз комбинати «Баракати шири Ёвон» дидан намуд. Роҳбарияти корхона роҷеъ ба нақшаҳои истеҳсолӣ ва иқтидори мавҷудаи саноатии коргоҳ ба Сарвари Давлат маълумот доданд.Президенти Ҷумҳури Тоҷикистон Эмомалӣ Раҳмон ҷиҳати равнақи бештари фаъолият ва бо сифати баланд тайёр кардани маҳсулоти ширӣ ба масъулон супоришҳои мушаххас дод. Зикр шуд, ки бо мақсади коркарди маҳсулоти худӣ, аз ҷумла маҳсулоти ширӣ аз ҷониби ҶСП «Комрон Агро холдинг» корхонаи коркарди шир бо иқтидори 5000 литр шир дар як шабонарӯз ба маблағи 2,5 млн. доллари амрикоӣ фаъол кунонида шуд.Таъкид шуд, ки айни ҳол наздики 20 нафар корманд дар ин комбинат фаъолият дошта, дар сехҳои истеҳсолии дигар ин теъдод ба 40 нафар, ки сокинони маҳаллӣ мебошанд, расонида хоҳад шуд.Дар корхона даҳ намуди маҳсулот истеҳсол шуда, ҳама онҳо дорои сертификат мебошанд. Дар корхонаи мазкур коргарон бо хӯроки гарм таъмин буда, музди миёнаи маоши онҳо 450-500 сомониро ташкил мекунад. Бо супориши Эмомали Раҳмон аз 1-уми августи соли равон маоши кормандони коргоҳ 800 сомонӣ ва аз оғози соли нав ба 1000 сомони расонида мешавад.