Боздошти ду нафар гумонбарони куштори А. Назаров

Душанбе, 13 август. (АМИТ «Ховар»).- Тавре хабар дода будем, шоми 21 июни соли равон аз ҷониби гурӯҳи муташаккилу мусаллаҳи ҷиноятӣ сардори Раёсати Кумитаи давлатии амнияти миллӣ дар ВМКБ генерал-майор Назаров Абдулло ба ҳалокат расонида шуда буд. Вобаста ба ин аз ҷониби кормандони мақомоти корҳои дохилӣ корҳои оперативӣ-ҷустуҷӯӣ оғоз гардида, нисбати ин далел аз ҷониби Прокуратураи генералии Ҷумҳурии Тоҷикистон парвандаи ҷиноятӣ оғоз карда шуд.Тавре сомонаи расмии ВКД ҶТ хабар медиҳад, барои дастгир намудани содиркунандагони ҷинояти мазкур чорабиниҳои оперативӣ-ҷустуҷӯӣ, профилактикӣ ва фаҳмондадиҳӣ ба роҳ монда шуд, ки дар натиҷа ду нафар гумонбарони ин куштор ихтиёран худро ба мақомоти ҳифзи ҳуқуқ супориданд ва нисбат ба онҳо корҳои тафтишотӣ идома дорад. Бинобар халал нарасонидан ба рафти тафтишоти пешакӣ аз гирифтани ному насаби гумонбаршудагон худдорӣ мешавад.