Дар Хоруғ домана ба қайд гирифта шуд

Хоруғ, 15 август. (АМИТ «Ховар», Л.Додо ). – Тавре ки сардухтури стансияи санитарию эпидемиологии ВМКБ А.Музаффаров иттилоъ дод, ду рӯз қабл дар маҳаллаи Шарифобод 17 нафар гумонбари бемории домана қайд шудааст, ки дар бадани 4 нафари онҳо мавҷудияти ин беморӣ ошкор гардид. Манбаи ин беморӣ ҳанӯз аз соли 1995 дар ин ҷо вуҷуд дорад. Ба гуфти сардори Раёсати тандурустии ВМКБ Саидбек Давлатбеков бо фармони Вазорати нигаҳдории тандурустии ҷумҳурӣ гурӯҳи корӣ таъсис ёфтааст, ки ба ҳайати он варзидатарин коршиносони соҳа шомил шудаанд. Гурӯҳи корӣ манбаъро муайян мекунаду дар рафъи он тадбирҳои судбахшро амалӣ месозад.