Деҳот обод мешавад

Рашт, 23 август . (АМИТ «Ховар», Мирзосафар Ризвонов).- Дар ҳудуди ҷамоати деҳоти Тагоба 4 китобхона, 5 мактаби таҳсилоти миёна, 1 клуб, 6 нуқтаи савдо, 1 нуқтаи фурӯши сӯзишворӣ, 3 бунгоҳи тиббӣ фаъолият намуда, дар хизмати мардуманд,-гуфт зимни сӯҳбат раиси ҷамоати деҳот Мирзоалӣ Мақсудов. Ба қарибӣ дар маркази деҳот бинои маркази савдои замонавӣ аз тарафи соҳибкор Маҳмадамин Каҷкулоев ба маблағи 120 ҳазор сомонӣ мавриди баҳрабардорӣ қарор гирифт. Дар маркази савдо нарх нисбат ба дигар мағозаҳои атроф арзонтар буда, 10 нафар бо ҷойи кори доимӣ таъмин гардиданд. То ҷашни 20- солагии иҷлосияи 16 Шӯрои Олӣ ташкили боз як сехи дӯзандагӣ барои таъмини занон бо ҷойи кори доимӣ дар назар аст,- иброз дошт раиси ҷамоат М.Мақсудов.