Дил ба даст овар, ки ҳаҷҷи акбар аст

Душанбе, 16 август. (АМИТ «Ховар», Мавҷуда Анварӣ). – Солҳои охир дар Ҷумҳурии Тоҷикистон хайру сахо кардан дар арафаи иду ҷашнвораҳо ба ҳукми анъана даромадааст, зеро дастгирии табақаи ниёзманд, оилаҳои камбизоат ва кӯдакистону мактаб-интернатҳое, ки дар он кӯдакони ятиму бепарастор тарбият мегиранд, кори савобу хайр аст. Бинобар ин Вазорати корҳои дохилии Ҷумҳурии Тоҷикистон ҳамасола ба табақаи ниёзманди кишвар ва кӯдакистону мактаб-интернатҳо кӯмак мерасонад.Ин навбат ин амали хайрхоҳона аз ҷониби Хадамоти шиносномавию бақайдгирии Вазорати корҳои дохилӣ ба Хонаи кӯдакони рақами 2-и Раёсати тандурустии шаҳри Душанбе сурат гирифт. Кормандони ин ниҳод ба кӯдакистон ба миқдори муайян маводи ғизоӣ, шири хушк барои кӯдакони навзод, ғизои кӯдакона, орд, шакар, биринҷ ва шириниҳо тақдим доштанд.