Фатҳи қуллаи нав аз ҷониби сайёҳон

Душанбе, 28 август. (АМИТ «Ховар», Фирӯза Давлатова). — Бо даъвати Кумитаи ҷавонон, варзиш ва сайёҳӣ ва Ассотсиатсияи рушди саноати сайёҳии Ҷумҳурии Тоҷикистон 75 нафар сайёҳи кӯҳнавард аз 17 кишвари дунё, аз қабили Амрико, Канада, Британияи Кабир, Франсия, Олмон, Полша ва дигар кишварҳо ба Тоҷикистон омаданд. Дар ин доира 72 нафар кӯҳнавард қуллаи беноми баландиаш 5100 метрро аз қаторкӯҳҳои Помир фатҳ намуда, онро қуллаи «Иҷлосияи таърихии 16-ум Шӯрои Олии Ҷумҳурии Тоҷикистон» номгузорӣ намуданд. Кӯҳнавардон бо истифода аз фурсати муносиб бори дигар қуллаи Исмоили Сомонӣ ва Озодиро фатҳ намуданд. Меҳмонон тасмим гирифтанд, ки захираҳои бойи сайёҳии Тоҷикистони соҳибистиқлолро дар арсаи ҷаҳонӣ тарғибу ташвиқ намуда, дар оянда барои ҷалби гурӯҳҳои нави сайёҳон ҷиҳати ширкат дар экспедитсияҳои навбатӣ мусоидат намоянд.