Гардиши савдои хориҷии Тоҷикистон дар 7 моҳ

Душанбе, 24 август. (АМИТ «Ховар», Лаззат Диловарзод).- Бино ба маълумоти Агентии омори назди Президенти ҶТ гардиши савдои хориҷӣ дар давоми 7 моҳи соли 2012 дар муқоиса бо ҳамин давраи соли 2011 хуб арзёбӣ шудааст. Дар такя ба манбаи мазкур, ёдовар бояд шуд, ки гардиши савдои хориҷии Ҷумҳурии Тоҷикистон дар давоми моҳҳои январ-июли соли ҷорӣ 2 млрд. 828,6 млн. доллари ИМА-ро ташкил додааст, ки нисбат ба ҳамин давраи соли 2011 ба андозаи 279,4 млн. доллар зиёд аст. Бояд ёдовар шуд, ки Ҷумҳурии Тоҷикистон бо 91 мамолик, аз ҷумла бо 10 кишвари ИДМ ва бо 81 давлати хориҷи дур муносибатҳои савдои хориҷии худро ба роҳ мондааст. Дар гардиши савдои хориҷӣ ҳиссаи мамолики хориҷи дур мавқеи бештаре дорад, зеро 56,6 фоизи савдои хориҷӣ , ки маблағи гардиши савдои он 1 млрд.596,9 млн. долларро ташкил медиҳад, ба ин давлатҳо мансуб аст.Савдои хориҷии Ҷумҳурии Тоҷикистон бо ИДМ дар давоми 7 моҳи соли ҷорӣ 1 млрд. 231,7 млн. долларро ташкил дод, ки нисбат ба ҳиссаи савдои мамолики хориҷи дур 375,2 млн. доллари амрикоӣ кам аст.Бо вуҷуди он, гардиши савдои хориҷӣ дар 7 моҳи соли ҷорӣ нисбат ба ҳамин давраи соли гузашта бо мамлакатҳои ИДМ 9,8 фоиз ва бо мамлакатҳои хориҷи дур 11,8 фоиз зиёд шудааст.