«Ховарон»-ро худсарона ишғол намуданд

Душанбе, 3 август. (АМИТ «Ховар», Мавҷуда Анварӣ). — Аз ҷониби кормандони мақомоти ҳифзи ҳуқуқ муайян карда шуд, ки шаҳрванд Оламбӣ Мадалиевна Қурбонова, (соли таваллудаш 1964, сокини шаҳри Кӯлоб) моҳи июли соли ҷорӣ дар заминҳои маҳаллаи «Ховарон», қитъаи 4-уми шаҳри Душанбе дар масоҳати 15-метри мураббаъ қитъаи заминро худсарона, беиҷозат ва бидуни ҳуҷҷатгузории расмӣ ишғол намуда, хонаи истиқоматӣ сохтааст.Инчунин Қадриддин Мирович Шашаев, (соли таваллудаш 1973, сокини ноҳияи Ҷиликӯл) моҳи июли соли ҷорӣ дар заминҳои маҳаллаи «Ховарон», қитъаи 4-уми шаҳри Душанбе, дар масоҳати 100-метри мураббаъ қитъаи заминро худсарона, беиҷозат ва бидуни ҳуҷҷатгузории расмӣ ишғол намуда, хонаи истиқоматӣ бунёд намудааст. Тибқи иттилои мақомоти прокуратураи кишвар дар нимсолаи аввали соли ҷорӣ вобаста ба қонунгузории замин 361 санҷиш гузаронида, 3072 санади эътиноии прокурорӣ содир шуда, дар натиҷаи баррасии онҳо 1575 нафар ба ҷавобгарии интизомӣ, моддӣ ва маъмурӣ кашида шуда, 340 парвандаи ҷиноӣ оғоз, зиёда аз 57 ҳазор сомонӣ зарар барқарор ва зиёда аз 412 га замин ба ҳолати аввала баргардонида шудааст. Дар ин давра ба 859 қарори раисони шаҳру ноҳияҳо эътироз эълом шуд, ки 455-тои он вобаста ба қонунгузории замин мебошад.