Ихтиёриёни ҷавон соҳиби гувоҳнома шуданд

Душанбе, 30 август. (АМИТ «Ховар», Сарвинози Рӯҳуллоҳ). – Имрӯз аъзои аввалин клуби ихтиёриёни Радиои «Ватан» баъди хатми курси махсус соҳиби гувоҳнома шуданд. Дар маросими супоридани гувоҳномаҳо роҳбари шӯъбаи кор бо ҷомеаи Сафорати ИМА дар Тоҷикистон Уэсли Робертсон ва корманди ҳамин шӯъба Шерзод Абдуҷабборов ширкат доштанд. Дар ин бора ба АМИТ «Ховар» директори барномаҳои Радиои «Ватан» Субҳон Ҷалилов хабар дод. Номбурда гуфт, ин клуб як моҳ қабл таъсис ёфт ва аъзои он баъди хатми курс ба фаъолияти ихтиёрӣ ва некхоҳӣ оғоз кардаанд. -Онҳо бо барномаҳои махсуси шавқовар ба аёдати бачаҳои беморхонаҳо ва хона-интенатҳо рафтанд. Аз 1 то 8 август ба аъзои клуб чанд нафаре, ки худашон таҷрибаи ихтиёрӣ доштанд. дарс гуфтанд. Яъне, бачаҳо дар ин курс дар баробари маълумот гирифтан дар бораи ҳаракати ихтиёрӣ, ҳамчунин нозукиҳои суратгирӣ, кор бо барномаҳои компютерӣ, истифода аз имконоти интернет, коидаҳои асосии фаъолияти хайрхоҳӣ, блогерӣ ва ғайраро омӯхтанд,-гуфт С. Ҷалилов. Ба гуфти номбурда, 20 нафар ҷавон сохиби гувоҳномаи хатми курс шуданд ва акнун дар мактабҳои шаҳру навоҳии худ дар атрофашон нафарони дигарро, ки мақсади кӯмакрасонӣ, некхоҳӣ ва ободиро доранд, ҷамъ меоваранд. Маврид ба зикр аст, ки ихтиёрӣ (волонтёр) –нафарест, ки барои чомеа ва шахсони алоҳида ройгон вақт чудо мекунад ва кӯмак мерасонад. Онҳоро кӯмакрасонҳои ҷамъиятӣ низ гуфтан мумкин аст. Ҳамасола дар дунё 5 декабр Рӯзи ихтиёриён ҷашн мешавад. Шумораи ихтиёриён дар дунё беш аз 110 миллион аст. Аз ин шумора 2,5 миллион нафар дар Русия зиндагӣ мекунад. Шумораи бештари ихтиёриён дар Канада, Амрико ва Австралия зиндагӣ доранд. Дар Чехия, Латвия ва Венгрия ихтиёриёнро ба аскарон баробар медонанд. Дар Амрико 56% аҳолии болиғ ихтиёрист.