Интихоби ҷойи кор дар ярмарка

Кӯлоб, 29 август. ( АМИТ «Ховар», Сулаймон Холов).-Дар шаҳри Кӯлоб бо ташаббуси раёсати Агентии давлатии ҳифзи иҷтимоӣ, шуғли аҳолӣ ва муҳоҷират то имрӯз ҳашт маротиба ярмаркаи ҷойҳои холии корӣ ва вазифаҳои озод гузаронида шуда, шумораи муайяни сокинон бо ҷои кор фаро гирифта шудаанд. Дар ярмаркаи навбатии соҳавӣ аз чониби муассисаҳои фарҳанги шаҳру ноҳияҳои минтақаи Кӯлоби вилояти Хатлон 261 ҷойи кории холӣ ба корҷӯён пешниҳод гардид.Дар он намояндагони филиали Муассисаи давлатии маркази таълими калонсолони Тоҷикистон, омӯзишгоҳҳои касбию техникӣ ва масъулини раёсати Агентии давлатии ҳифзи иҷтимоӣ, шуғли аҳолӣ ва муҳоҷирати ноҳияҳои минтақа низ ширкат варзида, омӯзиши курсҳои кӯтоҳмуддати тахассусиро ба ҷавонону корҷӯён пешниҳод карданд.