Кӯмак ба ятимону бепарасторон

Душанбе, 17 август. (АМИТ «Ховар», Лутфия Эшонқулова).-Дар арафаи Иди Фитр аз ҷониби зерсохтори Вазорати корҳои дохилӣ, Хадамоти шиносномавию бақайдгирӣ ба Хонаи кӯдакони рақами 2-и Раёсати тандурустии шаҳри Душанбе ба миқдори муайян, маводи ғизоӣ аз қабили шири хушк барои кӯдакони навзод, ғизои кӯдакона, орд, шакар, биринҷ ва шириниҳо тақдим гардид. Тавре сомонаи расмии ВКД ҶТ хабар медиҳад, масъулини ин муассисаҳо дар ҷавоб ба ин ғамхориҳои роҳбарияти Вазорати корҳои дохилӣ изҳори умедворӣ намуданд, ки ин амали хайрхоҳона, ки дар пайравии сиёсати Ҳукумати Ҷумҳурии Тоҷикистон ва Президенти кишвар анҷом дода шудааст, дар оянда низ идома хоҳад ёфт. Бояд қайд кард, ки Вазорати корҳои дохилии Ҷумҳурии Тоҷикистон барои дастгирии табақаи ниёзманди кишвар ва чунин кӯдакистонҳову мактаб-интернатҳо, ҳамасола кӯмак мерасонад.