Мактаби нав дар Кангурт

Темурмалик, 30 август. (АМИТ «Ховар», Сулаймон Холов).- Барои толибилмони мактаби таҳсилоти асосии рақами 16 деҳаи Оби Ширини ҷамоати деҳоти Кангурти ноҳияи Темурмалик мактаби нав бунёд ёфт.Сохтмони мактабро ҶДММ «Наврӯз»-и ноҳияи Данғара дар муддати 1 сол пурра ба анҷом расонида, дар бунёди он беш аз 1млн. 265 ҳазор сомонӣ масраф гардидааст. Маҷмӯан ҳамаи муассисаҳои таълимии ноҳия ба соли нави таҳсил омода мебошанд. Қаблан дар 2 бинои таълимии мактаб, ки 10 синфхона дошт, шароити номусоиди таълим мавҷуд буду боми синфхонаҳо мечакид. Бинои нав бо лавозимоти зарурии хониш муҷаҳҳаз мебошад ва ҳам тӯҳфаи хубест ба истиқболи ҷашнҳои бузурги 21- солагии истиқлолияти кишвар ва 20- солагии иҷлосияи таърихию тақдирсози 16- уми ШО ҶТ.