Мулоқоти Г. Шералӣ бо намояндагони Фонди Оғохон

Душанбе, 29 август. (АМИТ «Ховар», Дилшодаи Хайруллоҳ). – Имрӯз вохӯрии вазири энергетика ва саноати Ҷумҳурии Тоҷикистон Гул Шералӣ бо намояндагони Фонди Оғохон бо сардории Лутаф Қассам ва Озодхон Давлатшоев баргузор гардид. Дар вохӯрӣ масъалаҳои ҳамкориҳои дуҷониба дар соҳаи энергетика ва саноат, аз ҷумла ташкили корхонаҳои дӯзандагӣ, коркарди меваю сабзавот, маҳсулоти ширӣ (саноатӣ), истеҳсоли қолинҳои дастӣ дар вилояти Хатлон ва ВМКБ, сохтмони як адад НБО-и хурд (1:2 мВт) дар вилояти Хатлон ва масъалаҳои вобаста ба НБО-ҳои Санобод ва Себзор мавриди баррасӣ қарор гирифтанд. Тавре ки вазири энергетика ва саноати Ҷумҳурии Тоҷикистон Гул Шералӣ зикр намуд, Ҷумҳурии Тоҷикистон дорои захираҳои зиёди энергетикӣ, ашёи кишоварзӣ буда, ин имкон медиҳад, ки онҳо дар корхонаҳои саноатӣ коркард шаванд. Зикр шуд, ки густариши ҳамкориҳои дуҷонибаи мутақобилан судманд дар ин ва самтҳои дигар мувофиқи мақсад мебошад. Ҷаноби Лутаф Қассам оид ба мавҷуд будани заминаҳои мусоид барои вусъати ҳамкориҳо дар соҳаҳои мазкур ибрози назар намуд. Ҷонибҳо аз натиҷаҳои вохӯрӣ изҳори қаноатмандӣ намуда, иброз доштанд, ки густариши ҳамкориҳо дар ин самт ба манфиати ҳарду ҷониб хоҳад буд.