Наботи соҳибкор

Душанбе, 23 август. (АМИТ «Ховар», Л. Додо). — Соҳибкории истеҳсолӣ аз омилҳои муҳими баланд бардоштани сатҳу сифати зиндагии мардуми кишвар ва заминаи боэътимоди таъмини рушди босуботи иқтисодиёти миллӣ, афзун намудани табақаи миёнаҳол ва ҳалли масъалаҳои иқтисодиву иҷтимоӣ мебошад. Маҳз бо ҳамин мақсад Ҳукумати кишвар ба дастгирӣ ва рушди соҳибкорӣ таваҷҷӯҳи махсус зоҳир менамояд. Соҳибкор Набот Додихудоева аз шумули бонувони соҳибкорест, ки фаъолияти худро аз фурӯши молҳои ниёзи аввал, ки аз давлати ҳамсояи Қирғизистон меовард, оғоз бахшида, баъдан бо гирифтани қарзҳои бонкӣ тавонист фаъолияти соҳибкории худро равнақ бахшад. Чанд сол қабл Набот Додихудоева Ҷамъияти дорои масъулияти маҳдуди «Насим»-ро таъсис дод, ки фаъолияти асосии он аз коркарди мева, хусусан тут равона шудааст. Баҳри анҷоми ин корҳо дар шаҳри Хоруғ як сехи хурд фаъолият мекунад, ки дар он ҳафт нафар бо ҷойи корӣ таъмин шудаанд. Ин бонуи кордон ният дорад, ки фаъолияти соҳибкориашро боз ҳам васеътар намуда, аз аввали соли 2013 ба коркарди дигар меваҳои лазизи Бадахшон шурӯъ кунад.