Нобудсозии зиёда аз 300 кг маводи мухаддир

Душанбе, 13 август. (АМИТ «Ховар», Мавҷуда Анварӣ). — 10 августи соли 2012 дар Раёсати Агентии назорати маводи нашъаовари назди Президенти Ҷумҳурии Тоҷикистон дар ВМКБ дар шаҳри Хоруғ маросими сӯзонидани зиёда аз 300 кг маводи нашъадор, ки бештар аз 30 килои он героин, қариб 100 кило афюн ва зиёда аз 176 килограмм маводи мухаддири гурӯҳи каннабис буданд, баргузор гардид. Дар ин бора аз Агентии назорати маводи нашъаовари назди Президенти Ҷумҳурии Тоҷикистон ба АМИТ «Ховар» иттилоъ доданд. Тибқи иттилои манбаъ, ин миқдор мухаддирот аз ҷониби кормандони мақомоти ҳифзи ҳуқуқ ва сохторҳои қудратии вилоят дар ҷараёни тадбирҳои фаврию ҷустуҷӯӣ мусодира шуда буданд. Нобудсозии маводи мухаддир дар печи махсуси РАНМН дар ВМКБ бо иштироки бевоситаи комиссияи махсус дар ҳайати намояндагони мақомоти ҳифзи ҳуқуқ, прокуратура, суд, мутассадиёни РАНМН вилоят, инчунин намояндагони воситаҳои ахбори омма гузаронида шуд.