Оғози бозиҳои варзишии ҷавонон

Душанбе, 29 август. (АМИТ «Ховар», Дилшодаи Хайруллоҳ). — Бо ташаббуси Кумитаи ҷавонон, варзиш ва сайёҳӣ 15-16 сентябри соли ҷорӣ дар мактаби махсуси варзишии кӯдакону наврасони захираҳои олимпии №4-и шаҳри Душанбе мусобиқаи кишварии шиноварӣ байни наврасони солҳои таваллуди 1994-2001 ва ҷавонони солҳои таваллуди 1986-1993 гузаронида мешавад. Дар чорабинии варзишӣ аз шаҳри Душанбе 4 даста, аз вилоятҳои Хатлону Суғд 2 дастагӣ ва аз ноҳияи тобеи марказ 2 даста ширкат меварзанд. Ҳамчунин Кумитаи ҷавонон, варзиш ва сайёҳӣ бахшида ба таҷлили 20-солагии Иҷлосияи 16-уми Шӯрои Олии Ҷумҳурии Тоҷикистон ва бо мақсади тарғибу ташвиқи камонварӣ байни ҷавонон аз 20 то 24 сентябри соли 2012 дар шаҳри Хуҷанди вилояти Суғд мусобиқаи кушоди камонварӣ барои дарёфти Ҷоизаи Зебунисо Рустамоваро мегузаронад. Дар ин бора ба мухбири АМИТ «Ховар» аз бахши иттилоотию таҳлилии Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон иттилоъ доданд.