Пармакунии озмоишии қабатҳои конҳои нафту газ

Душанбе, 8 август. (АМИТ «Ховар», Дилшодаи Хайруллоҳ). — Дар ҳудуди ҷумҳурӣ дар айни замон дар 4 майдони ояндадор корҳои пармакунӣ ва озмоишии қабатҳои маҳсулдор идома дорад. Умқи лоиҳавии майдони Маҳрам 4800 метр буда, то имрӯз 440 метри он парма шудааст. Дар майдони Олимтойи шарқӣ то жарфи ниҳоии 3765 м. парма шудааст. Ҳоло дар дохили чоҳ корҳои таҳкиқотию озмоишӣ оид ба мавҷудияти захираҳои нафту газ дар марҳилаи анҷомёбӣ қарор дорад. Маблағгузорӣ ва пармакунии ин чоҳро ширкати «Кӯлоб Петролеум Лимитед» амалӣ менамояд. Пармакунӣ ва маблағгузории чоҳи № 1 майдони «Қӯрғонтеппа» — ро низ ширкати «Кӯлоб Петролеум Лимитед» анҷом медиҳад. Умқи лоиҳавии ин чоҳ 2865 метр мебошад. То ин дам ин чоҳ то умқи 2655 метр парма шудааст ва тибқи барномаи ширкати «Кӯлоб Петролеум Лимитед» корҳои пармакунӣ то 3500 метр давом дода мешаванд. Майдони Сариқамиш аз тарафи Ҷамъияти саҳомии кушодаи «Газпром» парма шуда истодааст. Чуқурии лоиҳавии ин чоҳ 6300 метрро ташкил медиҳад. То 6 – уми августи соли ҷорӣ чуқурии ин чоҳ 4808 метрро ташкил медод. Дар ин бора ба хабарнигори АМИТ «Ховар» аз котиботи Вазорати энергетика ва саноати Ҷумҳурии Тоҷикистон иттилоъ доданд.