Пирӯзии Мавзуна дар Лондон-2012

Душанбе, 7 август. (АМИТ «Ховар», Пайрав Назаров).- Варзишгари тоҷик Мавзуна Чориеваи 19-сола дар даври чаҳорякниҳоӣ дар вазни то 60 кг дар бозиҳои Лондон-2012 пирӯз шуд ва ӯ ҳадди ақал соҳиби медали биринҷӣ мешавад. 6-уми август Мавзуна бо Ченг Донги 25-сола аз Чин, барандаи дукаратаи медалҳои нуқраи мусобиқаи қаҳрамонии ҷаҳон (солҳои 2008-ум ва 2010-ум) рақобат кард. Бо вуҷуди он ки қади Ченг Донг нисбат ба Мавзуна 17 сантиметр баландтар буд (қади Чориева 1 м 60 см мебошад), дар ин қувваозмоӣ муштзани тоҷик кӯшиш кард, ки зарбаҳояш ба ҳадаф расанд. Қувваозмоии пуршиддат бо пирӯзии Мавзуна Чориева аз рӯи холҳо бо ҳисоби 13:8 (2:2, 2:1, 4:3, 5:2) поён ёфт. Хотиррасон мекунем, ки 8 августи соли ҷорӣ дар даври нимниҳоӣ Мавзуна Чориева бо Кэт Тейлор, варзишгар аз Ирландия қувва меозмояд.