Рушди ҳамкориҳо бо Озарбойҷон

Душанбе, 6 август. (АМИТ «Ховар», Покиза Маҳмадбекова). — Имрӯз дар Душанбе вохӯрии вазири рушди иқтисод ва савдои ҷумҳурӣ Шариф Раҳимзода бо Сафири фавқулодда ва мухтори Ҷумҳурии Озарбойҷон дар Ҷумҳурии Тоҷикистон Аббосалӣ Гасанов баргузор гардид.  Аз маркази матбуоти вазорати мазкур ба мухбири АМИТ «Ховар» иттилоъ доданд, ки дар ҷараёни мулоқот Шариф Раҳимзода рушди ҳамкориҳои мутақобилан судмандро дар соҳаҳои мухталифи иқтисоди миллӣ самараи нек арзёбӣ кард. Аббосалӣ Гасанов дар навбати худ иброз дошт, ки баҳри вусъат додани муносиботи иқтисодию тиҷоратии ду кишвари бо ҳам дӯст ҳамчун сафири Ҷумҳурии Озарбойҷон дар Ҷумҳурии Тоҷикистон аз тамоми имкониятҳо истифода хоҳад кард. Иқтисод ва тиҷорат, ҷалби сармоягузорони озарӣ дар рушди соҳаҳои мухталиф, ташкили корхонаҳои саноатӣ, инчунин баргузор намудани бизнес- форумҳо бо иштироки намояндагони бахши хусусӣ мавзӯъи калидии мулоқоти Шариф Раҳимзода бо Аббосалӣ Гасанов буд.