Саҳми Тоҷикистон дар мубориза бо қочоқи маводи мухаддир назаррас аст

Душанбе, 28 август. (АМИТ «Ховар», Мавҷуда Анварӣ). — Сафири Фавқулодда ва Мухтори Ҷумҳурии Тоҷикистон дар ИМА Нуриддин Шамсов бо Ёвари Котиби Давлатии ИМА оид ба ҳамкории байналмилалӣ дар соҳаи мубориза бо маводи мухаддир ва ҳифзи ҳуқуқ Уиллям Браунфилд мулоқот намуд. Дар мулоқот дипломати тоҷик гуфт, ки Ҳукумати Тоҷикистон ба мубориза бар зидди маводи мухаддир бо назардошти хатари он ба ҷамъият ва амнияти кишвар таваҷҷӯҳи махсус зоҳир менамояд ва бо ин мақсад бо кишварҳои дӯст, аз ҷумла ИМА ва созмонҳои байналмилалӣ ҳамкории самарабахшро ба роҳ мондааст. Ӯ вазъи имрӯзаи ҳамкории дуҷонибаро дар ин соҳа қаноатбахш арзёбӣ намуд ва таъкид кард, ки ҳарду ҷониб барои рушди он тавон ва имкониятҳои бештар доранд. Уилям Браунфилд дар навбати худ изҳор кард, ки имрӯз ИМА ҳамкориашро бо Тоҷикистон дар самти таҳкими амнияти сарҳадӣ бо Афғонистон ва мубориза алайҳи қочоқи маводи мухаддир идома медиҳад. Ӯ таъкид намуд, ки саҳми Тоҷикистон дар мубориза бо қочоқи маводи мухаддир назаррас аст. Дипломати амрикоӣ илова кард, ки ҷиҳати вусъати минбаъдаи ҳамкории самарабахши дуҷониба ҷониби америкоӣ дар доираи фаъолияти барномаҳои худ кӯмакашро ба Тоҷикистон афзоиш медиҳад.