Сафирони нав ба тавсеаи ҳамкориҳо ҳавасманданд

Душанбе, 10 август. (АМИТ «Ховар», Афшини Муқим).- Имрӯз Президенти Ҷумҳурии Тоҷикистон Эмомалӣ Раҳмон аз сафирони фавқулодда ва мухтори Ҷумҳурии Туркманистон, Фаронса, Африқои Ҷанубӣ, Япония, Руминия ва Ордени Малта эътимоднома қабул намуд. Эмомалӣ Раҳмон дар доираи мулоқоти худ бо сафирон роҷеъ ба дурнамои ҳамкории Тоҷикистон бо кишварҳои фавқуззикр ибрози андеша намуда, таъкид кард, ки алъон барои тавсеаи ҳамкорӣ дар соҳаҳои мухталиф бо кишварҳои номбурда заминаи мусоид фароҳам омадааст ва бо истифода аз шароиту имконоти мавҷуда бояд равобити Тоҷикистон бо ин кишварҳо тақвият дода шавад.   Сафирони фавқуллодда ва мухтори ҷамоҳири Туркманистон, Фаронса, Африқои Ҷанубӣ,Япония,  Руминия ва Ордени Малта Эмомалӣ Раҳмонро бовар кунониданд, ки тамоми кӯшишҳои худро дар самти рушди ҳамкориҳои минбаъда бо Тоҷикистон ба харҷ хоҳанд дод.