Санҷиши 210 субъекти хоҷагидор

Душанбе, 14 август. (АМИТ «Ховар», Лаззат Диловарзод).- Хадамоти назорати истифодаи амволи давлатӣ дар давоми 7 моҳи соли ҷорӣ ҳолати нигаҳдорӣ, истифодабарӣ, риояи тартиби ба иҷора додан, фурӯш ва аз эътибор соқит намудани воситаҳои асосии 210 субъекти хоҷагидорро мавриди санҷиш қарор дода, баҳри бартараф намудани камбудӣ ва норасоии мавҷуда ба ҳар кадоми он хулосаи санҷишро пешниҳод намуд,- иброз дошт муовини аввали раиси Кумитаи давлатии сармоягузорӣ ва амволи давлатӣ Анвар Наҷмиддинов ба мухбири АМИТ «Ховар».Тибқи маълумоти расмӣ дар миқёси ҷумҳурӣ 233 ҳазору 337 адад субъекти соҳибкорӣ ба қайд гирифта шудааст. Бо қарори Ҳукумати ҷумҳурӣ аз 30-юми апрели соли ҷорӣ лоиҳаи Барномаи дастгирии давлатии соҳибкорӣ дар Ҷумҳурии Тоҷикистон таҳия гардид, ки айни замон мавриди амал қарор дорад. — «Кумита дар фаъолияти худ баҳри бунёди фазои мусоид, рушди соҳибкорӣ ва дастгирии ҳамаҷонибаи ташаббуси соҳибкорон диққати ҷиддӣ дода, дар таҳияи қарору қонунҳо ва соддатар намудани онҳо ҷиҳати рушди соҳа саҳми арзанда дорад»,-тазаккур дод А. Наҷмиддинов.