Таҷлил аз Рӯзи китоб

Душанбе, 31 август. (АМИТ «Ховар», Мавҷуда Анварӣ). – 4-уми сентябри соли ҷорӣ бахшида ба Рӯзи китоб Вазорати фарҳанги кишвар баргузории як зумра чорабиниҳои адабию фарҳангиро дар пойтахт ба нақша гирифтааст. Аз ҷумла, дар ин рӯз дар толори Вазорати фарҳанги кишвар нишасти илмӣ ба муносибати 40- солагии интишори китоби «Тоҷикон»-и Б. Ғафуров, намоишгоҳи китоб дар боғи устод Рӯдакӣ ва ҷаласаи тантанавӣ баргузор мегардад, ки дар он вазири фарҳанги ҷумҳурӣ М. Асрорӣ, мудири шӯъбаи фарҳанги Дастгоҳи иҷроияи Президенти кишвар М. Пиров ва раиси Иттифоқи нависандагони Тоҷикистон Меҳмон Бахтӣ иштирок намуда, сухан мегӯянд.Худи ҳамон рӯз баргузории маҳфили адабию ҳунарӣ бо иштироки адибон ва санъаткорон, боздид аз намоишгоҳи китобҳои нодир дар Китобхонаи миллии Тоҷикистон, сипас машварати роҳбарони муассисаҳои нашриявии пойтахт дар мавзӯи «Нашри китоб: дастовард ва мушкилот» ва гулбонги адабии «Шоме бо Ҳофиз» дар Китобхонаи миллии Тоҷикистон дар назар аст. Дар ин бора сармутахассиси Вазорати фарҳанг Раҳматулло Раҳматуллоев ба хабарнигори АМИТ «Ховар» хабар дод.