Ташрифи сафирони кишварҳои хориҷии муқими Тошканд ба Тоҷикистон

Душанбе, 23 август. (АМИТ «Ховар», Бекназари Абӯбакр). — 25-26-уми августи соли равон сафирони кишварҳои хориҷии муқими шаҳри Тошканди Ҷумҳурии Ӯзбекистон дар ҳайати 41 нафар, бо ҳайати ҳамроҳонашон ва ҳамсару фарзандон ба вилояти Суғди Ҷумҳурии Тоҷикистон ташриф меоранд.  Ба ҳайати меҳмонон сафирони фавқулодда ва мухтори давлатҳои ИМА, Қазоқистон, Қувайт, Арабистони Саудӣ, Покистон, Бангладеш, Булғористон дар Ӯзбекистон, сафирони фавқулодда ва мухтори давлатҳои Гурҷистон, Лаҳистон, Чехия, Куриё, Малайзия дар Тоҷикистон ва Ӯзбекистон, кордорони сафорати мамлакати Ҳошимии Урдун, кордори сафорати Уммон дар Ӯзбекистон шомиланд.Аз хадамоти матбуоти раиси вилояти Суғд ба АМИТ «Ховар» иттилоъ доданд, ки тибқи барномаи сафар боздиди меҳмонон аз корхонаи ресандагии «Олим-Текстайлз», корхонаҳои муштараки «Ҷавонӣ», «САТН», Ҷамъияти саҳомии «Қолинҳои Қайроққум», шиносоӣ бо «Боғи миллии Ваҳдат», майдони Исмоили Сомонӣ, МД «Ҳавзи шиноварӣ», варзишгоҳи «20-солагии Истиқлолият» ва КВДК «Кохи матбуот», минтақаи озоди иқтисодии «Суғд», осорхонаи вилоятии таърихию кишваршиносӣ, инчунин бозори Панҷшанбе дар шаҳри Хуҷанд дар назар аст. Ҳайати меҳмонон дар осоишгоҳи «Баҳористон»-и шаҳри Қайроққум истироҳат хоҳад кард.