Ҳайати Ҷумҳурии Тоҷикистон озими Ню-Йорк шуд

Душанбе, 24 сентябр. (АМИТ «Ховар», Мавҷуда Анварӣ). — Имрӯз ҳайати Ҷумҳурии Тоҷикистон таҳти роҳбарии Вазири корҳои хориҷӣ Ҳамрохон Зарифӣ ҷиҳати иштирок дар иҷлосияи 67-уми Маҷмаи Умумии Созмони Милали Муттаҳид (МУ СММ) озими шаҳри Ню-Йорк шуд.Дар назар аст, ки Вазири корҳои хориҷӣ дар ҷаласаи МУ СММ аз номи Президенти Ҷумҳурии Тоҷикистон Эмомалӣ Раҳмон суханронӣ намуда, дар чанд чорабинӣ дар чаҳорчӯби иҷлосия барпошаванда иштирок мекунад. Инчунин дар ҳошияи иҷлосияи 67-уми МУ СММ вохӯрии Вазирони корҳои хориҷии кишварҳои аъзои Муколамаи ҳамкориҳои Осиёӣ баргузор мегардад, ки зимни он Ҷумҳурии Тоҷикистон мақоми раисиро дар Муколома аз давлати Кувайт қабул мекунад. Дар чаҳорчӯби сафари кории вазир ба Ню-Йорк, инчунин мулоқотҳои ӯ бо роҳбарияти СММ ва ҳамтоёнаш аз кишварҳои алоҳида баргузор хоҳанд шуд.Дар ин бора аз Вазорати корҳои хориҷии кишвар ба АМИТ «Ховар» иттилоъ доданд.