Ҳашар ба истиқболи истиқлолият

Душанбе, 3 август. (АМИТ «Ховар», Мавҷуда Анварӣ). — Бо мақсади таъмини омодагии ҳамаҷонибаи шаҳри Душанбе ва барои дар сатҳи баланди ташкиливу сиёсӣ, ободониву тозагӣ ва маърифатнокӣ таҷлил намудани ҷашни 21-солагии Истиқлолияти давлатии Ҷумҳурии Тоҷикистон аз 31 август то 8 сентябри соли 2012 дар доираи ҳашари умумиҷумҳуриявӣ тибқи қарори раиси шаҳр М. Убайдуллоев дар пойтахт ҳашари умумишаҳрӣ эълон гардидааст. Тибқи ин қарор дар ин рӯзҳо дар қаламрави шаҳри Душанбе корҳои сохтмониву ободонӣ, таъмири биною иншоот, тоза намудани атрофи идораҳо, иншооти иҷтимоию маишӣ, кӯчаю хиёбонҳо, обод намудани гулгаштҳо ва боғҳои истироҳатию фароғатӣ гузаронида мешавад.Аз роҳбарони вазорату кумитаҳои давлатии ҷумҳурӣ, субъектҳои хоҷагидорӣ, идораю муассисаҳои давлатию ғайридавлатӣ, хусусию саҳомӣ, аҳли ҷамоатчигии пойтахт ва ҳар як сокини он хоҳиш мешавад, ки бо дарки масъулияти баланди шаҳрвандӣ дар татбиқи тадбирҳои ободониву созандагӣ, вобаста аз иқтидори мавҷудаашон иштироки ҳамаҷонибаро дар ҳашари умумиҷумҳуриявӣ таъмин намоянд.