Агар аҳли маориф бигзарад, боқӣ бувад номаш…

Душанбе, 25 сентябр.(АМИТ «Ховар», Ҳотам Рабиев).- Фаъолияти пурсамари муаллимони ҳақиқӣ ҳеҷ гоҳ фаромӯш нахоҳад шуд. Имсол ба таъсиси Академияи таҳсилоти Тоҷикистон 10 сол пур мешавад. Дар бинои ин махзани илм осорхонаи маориф фаъолият дорад, ки умри беш аз 50-сола дорад. Ба ин муносибат директори осорхонаи мазкур Саодати Абдуфаттоҳ китоберо таҳти унвони «Осорхона –махзани тарбия» нашр кардааст. Дар китоб таърихи ташаккули маориф, ба вижа осорхонаи маорифи Тоҷикистон маълумоти муфид дода шудааст.Таъсиси мактабҳои шакли нав дар солҳои 20-30-уми асри XX, корнамоиҳои муаллимон дар солҳои мудҳиши Ҷанги Бузурги Ватанӣ, таҷрибаи кори муаллимони пешқадами ҷумҳурӣ, таърихи таъсиси донишгоҳҳою пажуҳишгоҳҳо, фаъолияти имрӯзаи Академияи таҳсилоти Тоҷикистон китобро пурмуҳтаво ва хонданбоб намудааст.