Айб дар ош аст ё дар мош?

Душанбе, 03 сентябр (АМИТ «Ховар», Музаффари Рустам). — Аз 27 август то 2 сентябри соли ҷорӣ дар роҳҳои мошингарди ҷумҳўрӣ 19 садамаи роҳу нақлиётӣ ба қайд гирифта шудааст, ки бар асари онҳо 9 нафар ба ҳалокат расида, 20 нафари дигар бо ҷароҳатҳои гуногуни ҷисмонӣ дар беморхонаҳо бистарӣ гардидаанд. Аз ҷумла, дар ноҳияи Данғара 27 августи соли 2012, соати 20.15 ронандаи мошини тамғаи «Опел-Астра» Равшан Ниёзов, соли таваллудаш 1990, ҳангоми ҳаракат аз самти шаҳри Душанбе ба самти Кӯлоб дар деҳаи Балхӣ бехатарии ҳаракати роҳро таъмин карда натавониста, пиёдагарди ноболиғ Алиҷон Самадови чорсоларо зер мекунад, ки дар натиҷа пиёдагард ҷароҳати ҷисмонӣ бардошта, ҳалок мешавад. Бештари садамаҳои роҳу нақлиётӣ бо сабаби бо суръати баланд идора кардани воситаи нақлиёт, нодуруст ба сабкат (обгон) баромадан, итоат накардан ба аломатҳои огоҳкунандае, ки дар ҷойҳои лозимӣ насб шудаанд, сар задаанд. Аз ин рў, аз тамоми ронандагон талаб ва хоҳиш мешавад, ки қоидаҳои ҳаракат дар роҳро риоя намоянду ҷони худ ва дигаронро зери хатар нагузоранд. Дар ин бора аз шӯъбаи ташвиқоту тарғиботи Раёсати Бозрасии Давлатии автомобилии Вазорати корҳои дохилии ҶТ Маҳмадшариф Шамсов иттилоъ дод.