Бемории гулӯзиндонак пешгирӣ мешавад

Душанбе, 5 сентябр. (АМИТ «Ховар», Бекназари Абӯбакр). — Мувофиқи фармоиши Вазорати тандурустии кишвар, бо мақсади пешгирии бемории гулӯзиндонак, баланд бардоштани сатҳи масъунияти аҳолӣ нисбат ба бемории гулӯзиндонак, дар доираи Рӯзҳои миллии эмкунӣ бар зидди бемории гулӯзиндонак аз 24 то 29 сентябри соли 2012 даври якум дар байни аҳолии аз 7 то 21-сола бо ваксинаи АДС-М, аз 29 октябр то 3 ноябри соли ҷорӣ дар байни аҳолии аз 13 то 21-сола бо ваксинаи АДС-М гузаронида мешавад.Аз Вазорати тандурустӣ ба АМИТ «Ховар» иттилоъ доданд, ки дар назди вазорат Ситоди кишварии ҳамоҳангсозӣ ва гузаронидани Рӯзҳои миллии эмкунӣ бар зидди бемориҳои гулӯзиндонак ташкил гардида, ба сардорони раёсатҳои тандурустии вилоятҳо, шаҳри Душанбе, директорони марказҳои назорати давлатии санитарию эпидемиологии вилоятҳо, шаҳру ноҳияҳо ва директорони марказҳои ташаккули тарзи ҳаёти солим, директорони бахшҳои Маркази ҷумҳуриявии иммунопрофилактика супориш шудааст, ки ситодҳои вилоятӣ, шаҳрӣ ва ноҳиявиро низ созмон диҳанд. Ҳамчунин масъулон вазифадор шудаанд, ки барои гузаронидани эмкунӣ дар маҳаллаҳои дурдаст бригадаҳои сайёр ташкил кунанд.