Беш аз 300 000 тонна ангишт истихроҷ шуд

Душанбе, 27 сентябр. (АМИТ «Ховар», Дилшодаи Хайруллоҳ)- Ҳаҷми умумии истихроҷи ангишт то 27 сентябри соли ҷорӣ ба 300 380 тонна расонида шуд, ки ин нисбат ба ҳамин давраи соли гузашта қариб 200 %-ро ташкил медиҳад.Дар асоси барномаву чорабиниҳои Вазорати энергетика ва саноати Ҷумҳурии Тоҷикистон ҷиҳати рушди соҳаи ангишт, бо назардошти мунтазам зиёд шудани талаботи аҳолӣ ва корхонаву муассисаҳо ба ангишт корхонаҳои истихроҷкунанда фаъолияти худро самаранок ба роҳ монда, иҷрои нақшаро то имрӯз қариб ду баробар нисбат ба ҳамин давраи соли сипаришуда таъмин намуданд. Тибқи иттилои котиботи Вазорати энергетика ва саноати Ҷумҳурии Тоҷикистон дар айни замон дар анборҳои корхонаҳои соҳа ва нуқтаҳои фурӯши он зиёда аз 34 ҳазор тонна ангишт мавҷуд аст. Мувофиқи маълумоти мақомоти иҷроияи маҳаллии ҳокимияти давлатии вилоятҳо, шаҳру ноҳияҳо 1695 адад нуқтаи фурӯши ангишт (бо захираи 50611,3 тн.), аз ҷумла: вилоятҳои Суғд – 718 адад, Хатлон -589 адад, ВМКБ -62 адад, НТҶ ва шаҳри Душанбе – 326 адад мавриди истифода қарор доранд.Барои таъмини аҳолӣ ва муассисаҳои буҷавии ВМКБ аз корхонаҳои соҳа ба миқдори 5380 тонна ангишт интиқол ёфт.