Боздошти ду нафар бо гумони нашъаҷаллобӣ

Душанбе, 12 сентябр. (АМИТ «Ховар», Мавҷуда Анварӣ). — Кормандони Раёсати Агентии назорати маводи нашъаовари назди Президенти Ҷумҳурии Тоҷикистон дар вилояти Суғд дар ҳудуди шаҳри Хуҷанд соҳибкори 44-соларо, ки роҳбарии як дорухонаро ба ӯҳда дорад, бо гумонбарӣ ба қочоқи ғайриқонунии маводи мухаддир дастгир карданд. Зимни кофтукови шахсӣ аз вай халтачаи селофанӣ ёфт ва мусодира гардид, ки дар дохилаш 2 бастаи маводи навъи ҳашиш мавҷуд буд. Бо мақсади ошкор ва дастгир кардани ҳаммаслаки дастгиршуда кормандон дар ҳудуди шаҳри Хуҷанд аз ҷои истиқомати шаҳрванди 48-сола, фурӯшандаи дорухонаи мазкур боз 13 адад бастаи маводи навъи ҳашиш ёфтанд, ки вазни он қариб 10 килоро ташкил дод.Нисбат ба дастгиршудагон парвандаи ҷиноятӣ оғоз шудааст. Дар ин бора аз Агентии назорати маводи нашъаовари назди Президенти ҶТ ба АМИТ «Ховар» иттилоъ доданд.