Чанд хабар аз хориҷи кишвар

Боришоти зиёди борон дар Чин Душанбе, 25 сентябр. (АМИТ «Ховар»).- Расонаи хабарии «Форс Нюс» иттилоъ медиҳад, ки дар минтақаи Юнани Ҷумҳурии Мардумии Чин баъди боришоти зиёд чандин манзили зист пурра зери об монд. Аҳолии минтақаро кормандони ҳолатҳои фавқулоддаи кишвар ба ҷойҳои бехавф кӯчониданд. Ба гуфти роҳбари ситоди ҳолатҳои фавқулодда минтақаҳои дар ҳалқаи офати табиӣ қарордошта хисороти зиёд дидаанд. Роҳҳои мошингард ва хати барқ низ аз фаъолият бозмондааст. Мувофиқи маълумоти ҳавошиносони кишвар дар натиҷаи боришоти шабонарўзӣ сатҳи оби рўди Йензи то як метр боло рафта, лағзиши қитъаи замин ба амал омадааст. Бояд қайд кард, ки аз сабаби номусоидии вазъи ҳаво дар аксари хатсайрҳо парвози тайёраҳо ба вақти дигар мавқуф гузошта шудааст. Мутахассиони ҳавошинос иброз медоранд, ки чунин вазъи ҳавои номусоид чанд рўзи дигар боқӣ хоҳад монд.Таркиши сахт дар Ироқ Душанбе, 25 сентябр. (АМИТ «Ховар») Дар маркази Ироқ- шаҳри Бағдод бар асари як таркиши сахт 6 кас ба ҳалокат расида, чанд тани дигар ҷароҳати гуногун бардоштаанд. Ба иттилои як расонаи хабарӣ дар вақти ҳодиса кормандони мақомоти қудратӣ ҳозир шуда, беморонро ба беморхонаи марказӣ бурдаанд. Табибон вазъи саломатии чанде аз захмиёнро вазнин арзёбӣ мекунанд. Ба гуфти роҳбари Сарраёсати тафтишотии Вазорати корҳои дохилии кишвар як шахси номаълум чанд муддат қабл дар дохили автомашинаи мусофиркаш таҷҳизоти таркандаро насб намуда, онро тавассути дастгоҳи идоракунандаи фосилавӣ ба кор даровардааст. Дар айни ҳол тамоми кормандони сохторҳои қудратӣ дар макони ҳодиса фаъолият дошта, сабабҳои таркишро муайян менамоянд.Тарҷумаи Иброҳими Ҳабибуллоҳ