Дар 9 моҳ — 292 ҳазору 250 тонна ангишт

Душанбе, 26 сентябр. (АМИТ «Ховар», Лаззат Диловарзод).- Корхонаҳои истихроҷкунандаи ангишт фаъолияти худро дар соли ҷорӣ самаранок гардонида, иҷрои нақшаро то имрӯз қариб ду баробар нисбат ба соли гузашта зиёд намуданд,- иттилоъ доданд аз котиботи Вазорати энергетика ва саноати ҶТ ба мухбири АМИТ «Ховар».  Ба иттилои манбаъ, то 24-уми сентябри соли ҷорӣ корхонаҳои соҳаи ангишт ба миқдори 292 ҳазору 250 тонна ангишт истихроҷ намудаанд. Истихроҷи ангишт нисбат ба нақшаи пешбинишуда аз аввали соли 2012 ба андозаи 125 ҳазору 261 тонна ва нисбат ба ҳамин давраи соли 2011 ба миқдори 141 ҳазору 230 тонна зиёд аст. Дар назар аст, ки ҳаҷми умумии истихроҷи ангишт то 27-уми сентябр ба 300 ҳазор тонна расонида шавад, ки ин нисбат ба соли сипаришудаи 2011 қариб 200 фоизро ташкил медиҳад.