Дурнамои ҳамкориҳои иқтисодӣ баррасӣ гардид

Душанбе, 27 сентябр. (АМИТ «Ховар», Покиза Маҳмадбекова). — Дурнамои ҳамкориҳо дар бахшҳои мухталифи соҳаи иқтисод байни Ҷумҳурии Тоҷикистон ва Иттиҳоди Аврупо 27 сентябри соли равон дар мулоқоти муовини вазири рушди иқтисод ва савдо Умед Давлатзод бо мушовири масъалаҳои кӯмаки молиявӣ ва идораи молияи давлатии Комиссияи Аврупо Рупиндер Сингҳ мавриди баррасӣ қарор гирифт.  Дар ҷараёни вохӯрӣ доктор Р.Сингҳ дар бораи ҳадафи сафараш ба Тоҷикистон изҳор намуд, ки Иттиҳоди Аврупо минбаъд низ омода аст, то ҳамкориашро бо Ҷумҳурии Тоҷикистон вусъат бахшад. Аз ин лиҳоз, муҳим аст, ки дар рафти вохӯриҳо бо мақомоти салоҳиятдори ҷумҳурӣ ҷиҳати таҳияи барномаҳои минбаъда самтҳои бартари ҳамкорӣ ба инобат гирифта шаванд. Дар навбати худ У.Давлатзод самтҳои бартари рушди иқтисоди кишварро зикр карда, дар ин замина дурнамои ҳамкориҳои дуҷонибаро аз рӯи самтҳои мазкур ва дигар соҳаҳои муҳим номбар намуд.