Холид валади Гулмурод ба Душанбе чӣ овард?

Душанбе, 11 сентябр. (АМИТ «Ховар», Мавҷуда Анварӣ).- 8-уми сентябри соли ҷорӣ ҳангоми гузаронидани чораҳои фаврию ҷустуҷӯӣ аз ҷониби кормандони милитсия дар нохияи Шоҳмансури шаҳри Душанбе шаҳрванди Ҷумҳурии Исломии Афғонистон Холид валади Гулмурод, соли таваллудаш 1982, сокини вулусволии Дашти Қалъаи қарияи Аланги вилояти Тахори Афғонистон барои ғайриқонунӣ нигоҳ доштани маводи нашъадор ҳамчун гумонбар дастгир карда шуд.Дар ин бора сардори маркази матбуоти ВКД Маҳмадулло Асадуллоев ба АМИТ «Ховар» иттилоъ дод.Тибқи иттилои манбаъ, ҳангоми кофтукови шахсӣ аз борхалтаи ӯ 69 килою 120 грамм маводи нашъадори ҳашиш дарёфт ва мусодира карда шуд. Инчунин дар ҳамдастӣ дар ин кирдор шаҳрванди Ҷумҳурии Тоҷикистон Умедҷон Қаюмови 35 сола, сокини шаҳри Душанбе дастгир гардид. Аз рӯи ин ҳодиса парвандаи ҷиноӣ боз шудааст ва тафтиш идома дорад.