Хуҷанд: Омодагӣ ба ҷашни истиқлолият

Хуҷанд, 4 сентябр. (АМИТ «Ховар», Мирзалӣ Амонов).-Дар доираи омодагӣ ба ҷашни истиқлолияти кишвар бо иқдоми мақомоти иҷроияи хокимияти давлатии шаҳри Хуҷанд ба хотири фароҳам овардани шароити шоиста барои сокинони шаҳр дар маҳаллаҳои зист тадбирҳои судманд андешида мешаванд. Дар муддати кӯтоҳ дар назди биноҳои баландошёнаи шаҳр 8 майдончаи варзишӣ бунёд ва таҷҳизонида шуд, ки шумораи онҳо то охири сол ба 20 адад мерасад. Дар ҳудуди шаҳр аз оғози сол 21 корхонаи хурду калон мавриди истифода қарор гирифт, ки дар маҷмӯъ 500 нафарро бо ҷои кори доимӣ таъмин намуд. Корхонаҳои шаҳр давоми 8 моҳ ба маблағи зиёда аз 208 миллион сомонӣ маҳсулот истеҳсол намуданд. Ҳамчунин иншооти зиёди манзилию маишӣ, фарҳангию маърифатӣ мавриди истифода қарор гирифта, 3595 метри мураббаъ роҳҳои кӯчаю хиёбонҳои шаҳр мумфарш шуданд.