ИМА ҷонибдори рушди муносибатҳо бо Тоҷикистон аст

Душанбе, 12 сентябр. (АМИТ «Ховар», Мавҷуда Анварӣ). – Дирӯз Сафири Фавқулодда ва Мухтори Ҷумҳурии Тоҷикистон дар ИМА Нуриддин Шамсов бо вакили Конгресс Ҷозеф Питтз мулоқот намуд.
Ба муносибати ёдбуди 11-умин солгарди қурбониёни фоҷиаи террористӣ дар шаҳри Ню-Йорк, ки соли 2001 рух дод, сафир аз номи роҳбарият ва ҳукумати кишвар ба Ҷозеф Питтз изҳори ҳамдардӣ кард. Таъкид гардид, ки баъд аз ин ҳодиса Тоҷикистон ва ИМА бо азму иродаи қавӣ тасмим гирифтанд, ки дар амри муборизаи оштинопазир бар зидди терроризми байналмилалӣ ва зуҳуроти он дар паҳлӯи ҳамдигар биистанд ва дар ин самт ҳамкории наздик ва шариконаро ба роҳ монанд. Ӯ Ҷозеф Питтзро бо иқдомҳои Тоҷикистон ҷиҳати таъмини амнияти минтақавӣ ва эҳёи Афғонистон, ҳамкории кишвар бо ИМА дар самтҳои мухталиф, аз ҷумла татбиқи лоиҳаҳои энергетикӣ, сохтмони роҳҳои транзитӣ ва пулҳо, демократикунонӣ, тавсеаи муносибатҳои байнипарлумонӣ шинос кард. Ҷозеф Питтз дар навбати худ таъкид кард, ки ИМА саъю талошҳои Ҳукумати Тоҷикистонро ҷиҳати ҳалли мушкилоти минтақавӣ ва кӯмак ба Афғонистон дастгирӣ менамояд ва доимо ҷонибдори рушди муносибатҳои шарикона ва гуногунҷанбаи дуҷониба бо Тоҷикистон мебошад. Дар ин бора аз Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» хабар доданд.